Spá Fótbolta.net - 9. sæti: Grindavík

Spáin:
1. ?
2. ?
3. ?
4. ?
5. ?
6. ?
7. ?
8. ?
9. Grindavík 35 stig
10. ÍBV 34 stig
11. Víkingur R. 25 stig
12. HK 12 stig

Um liðið: Töluvert af breytingum hafa átt sér stað á liði Grindavíkur frá því í fyrra. Nýtt þjálfarateymi í Grindavík og miklar mannabreytingar. Liðið endaði í 10. sæti Pepsi-deildarinnar í fyrra, sex stigum frá falli sem var vonbrigði. Annað árið í röð byrjaði Grindavík tímabilið af miklum krafti en seinni helmingurinn var hrein hörmung. Liði náði aðeins í átta stig í síðustu þrettán umferðunum í fyrra.

Þjálfari - Srdjan Tufegdzic: Tufa eins hann er yfirleitt kallaður tekur við Grindavíkur liðinu af Óla Stefán Flóventssyni. Hægt er að tala um hrein skipti því Óli Stefán tók við búi Tufa í KA á sama tíma. Tufa kom til landsins árið 2006 og lék þá með KA. Hann kom KA upp í Pepsi-deildina sumarið 2016 og stýrði liðinu í Pepsi-deildinni í fyrra þar sem KA endaði í 7. sæti.

Styrkleikar: Þrátt fyrir miklar breytingar á leikmannahópnum frá því í fyrra þá er sterkt fyrir Grindavík að þeir halda lykilleikmönnum og leikmönnum sem mynda hryggjarsúluna í liðinu. Það hjálpar nýjum leikmönnum að aðlaðast nýju liði. Þá bindum við einnig miklar vonir við Srdjan Tufegdzic sem tók við liðinu fyrir tímabilið, það var öflugt fyrir félagið að fá hann inn og spennandi að sjá hvernig hann nær að púsla liðinu saman. Það gæti líka hjálpað liðinu að fara pressulaust inn í tímabilið.

Veikleikar: Töluverðar breytingar eru á liðinu frá því í fyrra og útlendingarnir sem komu eru óskrifað blað. Það hefur tekist illa hjá Grindavík að fá til sín Íslendinga. Heimavöllurinn hjá þeim skilaði einungis fjórum sigrum í fyrra. Þrír af fjórum markahæstu leikmönnum liðsins í fyrra eru horfnir af braut og nú þarf að finna nýja markaskorara í Grindavík.

Lykilmenn: Gunnar Þorsteinsson og Rodrigo Mateo. Gunnar er fyrirliði Grindvíkinga og hefur verið lykilmaður í liðinu síðustu tímabil. Rodrigo er að fara inn í sitt fimmta tímabil í Grindavík og hefur vaxið ás megin með hverju tímabilinu.

Gaman að fylgjast með: Sigurjón Rúnarsson. 18 ára varnarmaður sem lék alla leikina í Lengjubikarnum með Grindavík. Fékk smjörþefinn af Pepsi-deildinni sumarið 2017 og fékk síðan enn fleiri tækifæri í fyrra.

Spurningamerkið: Útlendingarnir sem Grindavík fengu fyrir tímabilið eru allir stór spurningarmerki. Markvörðurinn serbneski Djogatovic hefur verið gríðarlega misjafn í vetur, á stundum rosalegar vörslur en þess á milli gerir hann afdrifarík mistök.

Völlurinn: Grindvíkingar eiga glæsilega stúku sem tekur 1450 áhorfendur. Grasið á vellinum sjálfum er yfirleitt alltaf iðargrænt og þá sérstaklega þegar líður á sumarið.

Þjálfarinn segir - Srdjan Tufegdzic
„Miðað við hvernig okkur var spáð í vetur þá er þetta hærra en áður. Sem er jákvætt og sýnir að við erum að gera eitthvað gott og þetta er allt á uppleið hjá okkur. Þessar spár eru skemmtilegar fyrir lesendur Fótbolta.net en þegar upp er staðið þá eru það leikirnir og frammistaða leikmannana sem skiptir máli. Ef 9. sætið yrði niðurstaðan þá er það betri árangur en í fyrra og markmið okkar er að gera betur en í fyrra. Það hafa orðið miklar breytingar á liðinu frá því í fyrra og það tekur tíma að púsla liðinu saman og ná stöðugleika. Það er mjög erfitt fyrir lið eins og Grindavík með allar þessar breytingar að segja í hvaða sæti liðið ætlar sér að vera í."

Komnir:
Josip Zeba frá HAGL
Marc McAusland frá Keflavík
Mirza Hasecic frá Sindra
Patrick N'Koyi frá Top Oss
Vladan Djogatovic frá Serbíu
Vladimir Tufegdzic frá KA
Hermann Ágúst Björnsson frá ÍH

Farnir:
Björn Berg Bryde í Stjörnuna
Brynjar Ásgeir Guðmundsson í FH
Sam Hewson í Fylki
Kristijan Jajalo
Sito
Will Daniels

Fyrstu fimm leikir Grindavíkur:
27. apríl Grindavík - Breiðablik
5. maí Grindavík - Stjarnan
11. maí ÍBV - Grindavík
16. maí Grindavík - KR
20. maí Grindavík - Fylkir

Sjá einnig:
Hin hliðin - Hermann Ágúst Björnsson
Niðurtalningin: Grindavík - Gunni Þorsteins og Alexander Veigar

Leikmenn Grindavík sumarið 2019:
Maciej Majewski
Adam Frank Grétarsson
Rodrigo Gomes Mateo
Aron Jóhannsson
Símon Logi Thasaphong
Vladimir Tufegdzic
Gunnar Þorsteinsson
Josip Zeba
Alexander Veigar Þórarinsson
Elis Alexander Tamburini
Valdan Djogatovic
Kiyabu Nkoyi (Patrick)
Nemanja Latinovic
Hilmar Andrew McShane
Jón Ingason
Hermann Ágúst Björnsson
Marc McAusland
Dagur Ingi Hammer Gunnarsson
Viktor Guðberg Hauksson
Marinó Axel Helgason
René Joensen
Ingi Steinn Ingvarsson
Sigurjón Rúnarsson
Sigurður Bjartur Hallsson

Spámennirnir: Arnar Daði Arnarsson, Arnar Helgi Magnússon, Benedikt Bóas Hinriksson, Daníel Geir Mortiz, Elvar Geir Magnússon, Guðmundur Aðalsteinn Ásgeirsson, Gunnar Birgsson, Hafliði Breiðfjörð, Magnús Már Einarsson, Tómas Þór Þórðarson