Íslenska U15 ára kvennalandsliðið tók þátt í einu af svokölluðum 'þróunarmótum' UEFA og lauk keppni í dag.
Ísland mætti Litháen í lokaumferðinni eftir stórsigur gegn Tyrkjum í fyrstu umferð og svo tap gegn heimastelpunum í Póllandi.
Ísland sýndi yfirburði gegn Litháum og tók forystuna á tólftu mínútu þegar fyrirliðinn Alma Rós Magnúsdóttir skoraði með góðu skoti úr teignum.
Ísabel Rós Ragnarsdóttir tvöfaldaði svo forystuna þegar hún fylgdi sláarskoti eftir með marki á 39. mínútu og var staðan 2-0 fyrir Ísland í leikhlé.
Hvorugu liði tókst að setja boltann í netið í síðari hálfleik og niðurstaðan flottur sigur Íslands sem lýkur keppni með sex stig úr þremur leikjum.
Ísland U15 2 - 0 Litháen U15
1-0 Alma Rós Magnúsdóttir ('12)
2-0 Ísabel Rós Ragnarsdóttir ('39)
