Mexíkóski þjálfarinn Javier Aguirre yfirgaf Estadio General Francisco Morazán leikvanginn í Hondúras alblóðugur eftir að hafa fengið bjórdós í höfuðið í nótt.
Aguirre var ráðinn þjálfari mexíkóska landsliðsins í sumar en það var í þriðja sinn á ferlinum sem hann var ráðinn í starfið.
Landsliðið tapaði fyrir Hondúras, 2-0, í fyrri leik liðanna í 8-liða úrslitum Þjóðadeildar CONCACAF í nótt og létu stuðningsmenn óánægju sína í ljós með því að kasta bjórdósum og öðrum hlutum inn á völlinn.
Ein bjórdósin hæfði Aguirre sem sýndi þó engin viðbrögð. Hann labbaði upp að þjálfara Hondúras og þakkaði fyrir leikinn, en það fór að blæða úr höfði hans í kjölfarið.
Aguirre er greinilega öllu vanur og gerði lítið úr atvikinu þegar vallarstarfsmenn og aðrir komu honum til aðstoðar.
Þjóðirnar eigast aftur við á miðvikudaginn en sigurvegarinn mun fara áfram í undanúrslit Þjóðadeildarinnar.
Don Javier Aguirre Moctezuma, mi fútbol. Le abren la cabeza de un botellazo y el tío hace como si nada. Luego hay otros que se pierden un partido porque se han cortado depilándose. pic.twitter.com/iGGwqny99h
— Rajadores del Fútbol (@RajadoresFutbol) November 16, 2024
Athugasemdir
