Marc Casado í leik með Barcelona
Spænski miðjumaðurinn Marc Casado er að njóta sín á fyrsta tímabili sínu með aðalliði Barcelona en hann fékk óvænt stórt hlutverk á miðsvæði liðsins fyrir þessa leiktíð.
Þessi 21 árs gamli varnarsinnaði miðjumaður fékk ekki margar mínútur undir stjórn Xavi á síðustu leiktíð en komst strax í uppáhald hjá Hansi Flick sem tók við liðinu í sumar.
Casado hefur verið magnaður í fyrri hluta tímabilsins og unnið sér fast sæti á miðsvæðinu.
Hann var einn af bestu mönnum liðsins í 4-0 stórsigrinum á erkifjendum Barcelona í Real Madrid, en hann segir þann dag hafa verið þann besta í lífi hans.
„Dagurinn sem við unnum Real Madrid 4-0 á Bernabeu er besti dagur lífs míns til þessa, alla vega á fótboltavellinum. Fjölskyldan sagði við mig að þau hefðu grátið allan leikinn,“ sagði Casado við Cope.
Casado er uppalinn hjá Barcelona og segist mikill stuðningsmaður félagsins.
„Ég hef ekkert á móti Madrídingum. Ég er harður aðdáandi Barcelona,“ sagði Casado enn fremur.
Luis de la Fuente, þjálfari spænska landsliðsins, valdi Casado í hópinn í fyrsta sinn í þessum glugga og lék miðjumaðurinn sinn fyrsta leik er hann kom inn af bekknum í 2-1 sigrinum á Dönum í Þjóðadeildinni í gær.
Athugasemdir
