Edda Garðarsdóttir.
Grein Kolbeins Tuma Daðasonar í Fréttablaðinu í morgun hefur vakið verðskuldaða athygli en þar skrifar hann um bréfið umtalaða sem fjórir leikmenn kvennalandsliðsins sendu til að reyna að losna við Sigurð Ragnar Eyjólfsson sem þjálfara kvennalandsliðsins.
Edda Garðarsdóttir kemur mikið við sögu í greininni en rifjuð eru upp tvö gömul atvik þar sem þjálfari var látinn fara eftir að óánægðir leikmenn hópuðu sig saman. Edda var í báðum liðum.
Þórður Lárusson sem var þjálfari kvennalandsliðsins en var látinn fara eftir óánægju leikmanna sagði: „Það var eitthvað hópefli sem fór af stað og Edda Garðarsdóttir stóð framarlega í því þrátt fyrir ungan aldur."
Þá var Úlfar Hinriksson látinn fara sem þjálfari Breiðabliks eftir að leikmenn fóru fram á þjálfaraskipti þrátt fyrir mikla velgengni liðsins. Í greininni er sagt að upptökin af því hafi verið að hann þurfti að velja milli Eddu og Þóru Bjargar Helgadóttur sem fyrirliða.
Mikið fjölmiðlafár skapaðist þegar Edda var ekki valin í lokahóp íslenska landsliðsins á EM í sumar.
Edda sló á létta strengi á Twitter í morgun og skrifaði:
„Fór í Hérastubb bakara í Grindavík. Lét reka afgreiðslukonuna á leiðinni út."
Smelltu hér til að lesa greinina úr Fréttablaðinu
Athugasemdir
