Þorlákur Árnason.
ÍBV mætir Víkingi á mánudag.
'Allir fótboltamenn, allavega leikmenn ÍBV, eru mótiveraðir í leiki á móti sterkum liðum'
ÍBV spilar sinn fyrsta leik í Bestu deildinni á mánudag þegar Eyjamenn heimsækja Víking á Víkingsvöll. ÍBV er nýliði í Bestu deildinni eftir að hafa unnið Lengjudeildina í fyrra. ÍBV er spáð 12. sæti deildarinnar í spá Fótbolta.net.
„Þetta er svona að skríða saman hjá okkur, höfum verið í miklum meiðslum í vetur. Leikmenn meiddust bæði í lok síðasta tímabils og um mitt tímabil í fyrra. Við erum búnir að vera með nokkuð marga þannig. Staðan á hópnum núna er nokkuð góð," sagði Þorlákur Árnason, þjálfari ÍBV, við Fótbolta.net í dag.
Hvernig leggst það í þig að mæta Víkingi á útivelli í fyrsta leik?
„Það er bara spennandi verkefni. Víkingur er sennilega búið að vera besta liðið í vetur, búnir að spila á allt öðrum vígstöðvum en önnur félög. Það er bara mikil áskorun og tilhlökkun. Það er gott að miða sig við það sem ég tel vera besta liðið í dag." Víkingur spilaði í Sambandsdeildinni gegn Panathinaikos í febrúar en það var viðureign um sæti í 16-liða úrslitum keppninnar.
„Við erum búnir að spila við KR, mættum þeim í Lengjubikarnum fyrir æfingaferð. Þá var KR heitasta liðið fyrir utan Víking. Það var gott að máta sig við KR og Stjörnuna fyrr í vetur. Allir fótboltamenn, allavega leikmenn ÍBV, eru mótiveraðir í leiki á móti sterkum liðum."
Eru einhverjir sem þú veist að munu ekki ná leiknum vegna meiðsla?
„Nei, það eru búnir að vera 4-5 leikmenn frá meira og minna í allan vetur, en ég held að það séu allir að skríða saman. Kannski er það líka bara að það sé að nálgast leikinn, leikmenn eru búnir að vera stefna á reyna ná fyrsta leik. Við erum í ágætis málum núna." segir Láki.
Athugasemdir
