Fótbolti.net ætlar að fjalla vel um aðra deildina í sumar eins og undanfarin ár og við ætlum að hita vel upp með því að birta spá fyrirliða og þjálfara í deildinni fram að móti.
Við fengum alla fyrirliða og þjálfara til að spá og fengu liðin því stig frá 1-11 eftir því en ekki var hægt að spá fyrir sínu eigin liði. Í fimmta sæti í þessari spá var Grótta sem fékk 155 stig af 242 mögulegum. Kíkjum á umfjöllun okkar um Gróttu.
Spá fyrirliða og þjálfara:
1. ?
2. ?
3. ?
4. ?
5. Grótta 155 stig
6. Njarðvík 142 stig
7. Höttur 140 stig
8. Reynir S. 101 stig
9. Dalvík/Reynir 75 stig
10. Ægir 71 stig
11. Sindri 69 stig
12. Hamar 39 stig
5. Grótta
Lokastaða í fyrra: 10. sæti í 2. deild
Eftir fall úr 1. deildinni árið 2011 var tímabilið í fyrra ekki til að hrópa húrra fyrir hjá Gróttu. Eftir misjafnt gengi var Sigurður Helgason látinn taka pokann sinn í ágúst og Guðjón Kristinsson og Dusan Ivkovic stýrðu skútunni út tímabilið. Gengi liðsins batnaði ekki í kjölfarið og Grótta var í fallbaráttu fram í næstsíðustu umferð. Tíunda sæti varð niðurstaðan en stefnan er sett talsvert ofar í ár á Seltjarnarnesi.
Ólafur Brynjólfsson hefur tekið við liðinu eftir að hafa þjálfað í Kópavogi undanfarin ár en honum til aðstoðar er Jens Elvar Sævarsson sem mun einnig spila með Gróttu í sumar. Ólafur er metnaðarfullur þjálfari og undir hans stjórn hefur Grótta sýnt fína spilamennsku í vetur. Grótta fór til að mynda í úrslit í B-deild Fótbolta.net mótsins þar sem liðið tapaði gegn Haukum í vítaspyrnukeppni. Í Lengjubikarnum tapaði liðið einungis einum leik og sæti í undanúrslitum hefði verið niðurstaðan ef Grótta hefði ekki notað ólöglegan leikmann fyrir mistök í leik gegn ÍR.
Grótta hefur styrkt leikmannahóp sinn talsvert í vetur. Jens Elvar er kominn frá Reyni Sandgerði en hann hefur verið iðinn við kolann í vor. Varnarmaðurinn öflugi Anton Ástvaldsson er kominn frá Hetti en hann tók sér frí frá fótbolta á síðasta tímabili. Gunnar Smári Agnarsson mun berjast um markvarðarstöðuna við Jón Kolbein Guðjónsson, Enok Eiðsson er kominn frá Haukum og þá er framherjinn Grímur Björn Grímsson einnig kominn svo eitthvað sé nefnt en fleiri leikmenn hafa líka bæst í hópinn.
Varnarmaðurinn reyndi Dusan Ivkovic ákvað að leggja skóna á hilluna eftir síðasta tímabil og hann verður ekki með Gróttu í sumar líkt og miðjumaðurinn öflugi Sölvi Davíðsson sem er einnig hættur. Þá fór framherjinn Magnús Bernhard Gíslason aftur í KV en hann skoraði níu mörk með Gróttu í annarri deildinni í fyrra þrátt fyrir að leika innan við helminginn af leikjum liðsins.
Grótta setur stefnuna mun hærra í sumar en í fyrra og liðið ætlar að blanda sér í slaginn um sæti í 1. deild á næsta ári. Grótta hefur sýnt í vetur að ýmislegt er spunnið í liðið og það hefur alla burði til að berjast í toppbaráttunni. Metnaðurinn og umgjörðin er til staðar en það kemur síðan í ljós í haust hversu ofarlega liðið nær að enda.
Styrkleikar: Með metnaðarfullan og efnilegan þjálfara og umgjörðin í kringum liðið er mjög góð. Vel skipulagt lið. Grótta er annað af tveimur liðum sem spilar heimaleikina á gervigrasi og það gæti verið styrkur.
Veikleikar: Gróttu gæti vantað afgerandi markaskorara. Liðið vann einungis einn leik á útivelli í fyrra og sá árangur verður að batna í sumar. Talsverðar breytingar hafa orðið á hópnum í sumar og þrátt fyrir gott gengi í vetur er spurning hvernig liðið smellur saman í sumar.
Lykilmenn: Anton Ástvaldsson, Guðmundur Marteinn Hannesson, Jens Elvar Sævarsson,
Þjálfarinn: Ólafur Brynjólfsson
,,Mér líst ágætlega á þessa spá. Þetta er efri hlutinn sem við stefnum að og þau lið sem eru spáð fyrir ofan höfum við unnið í vetur nema HK sem við höfum ekki spilað við. Veturinn hefur gengið gríðarlega vel og er hópurinn í mjög góðu líkamlegu standi og er tilbúin fyrir komandi átök. Aðstaðan og allt í kringum Gróttu er eins og hjá úrvalsdeildarliði þar sem mikill hópur manna vilja okkur þjálfurum og leikmönnum allt fyrir okkur gera. Liðsheildin og metnaður er til fyrirmyndar hjá strákunum og mikil eftirvænting að geta loksins byrjað mótið eftir allt erfiðið í vetur. Deildin verður mjög erfið og mörg lið sem stefna á að fara upp í 1.deild þannig að hver leikur verður úrslitaleikur."
Komnir:
Anton Ástvaldsson frá Hetti
Enok Eiðsson frá Haukum
Grímur Björn Grímsson frá Fram
Gunnar Smári Agnarsson frá Breiðabliki
Jens Elvar Sævarsson frá Reyni Sandgerði
Marteinn Már Jakobsson frá Skínanda
Rúnar Guðbjartsson frá Reyni Sandgerði
Sturlaugur Harladsson frá Hamar
Torfi Geir Hilmarsson frá Ými
Farnir:
Dusan Ivkovic hættur
Magnús Bernhard Gíslason í KV
Sölvi Davíðsson hættur
Þrír fyrstu leikir Gróttu
10. maí: ÍR (Ú)
18. maí: Hamar (H)
23. maí: Reynir S. (Ú)
Athugasemdir
