Grindavík er spáð sjöunda sætinu í Lengjudeildinni í sumar í spá Fótbolta.net.

Sjá einnig:
7. sæti í spá Fótbolta.net fyrir Lengjudeildina: Grindavík

Hvernig kom til að þú tókst við sem þjálfari Grindavíkur?

„Ég sagði upp á Selfossi eftir fimm góð ár þar. Ég ákvað að breyta til og sjá hvað myndi bjóðast."

„Blessunarlega bauðst mér starf í mínum gamla heimabæ og það þurfti ekkert mikið að sannfæra mig um það. Ég kann mjög vel við mig í Grindavík, gott að vera þar í rokinu og manni líður best heima hjá sér."

Teluru að Grindavík geti gert tilkall til þess að fara upp úr deildinni?

„Já, eins og ég hef sagt við alla þá getum við klárlega unnið öll lið en við getum klárlega tapað gegn öllum liðum. Við þurfum að hugsa dálítið um okkur, stabílísera okkur sem lið og sem hópur og vinna í okkar gildum. Þá eru allir vegir færir."

Liðið fékk fimm sinnum í 22 leikjum á sig mark í uppbótartíma og missti vegna þeirra af sex stigum.

Hvert er markmiðið í sumar?

„Markmiðið er að vinna í okkar leikstíl og í okkar gildum. Við erum með þau alveg á hreinu, hvernig við viljum við gera hlutina. Það er bara best fyrir okkur að hugsa bara um rassgatið á okkur, hvernig við ætlum að gera hlutina."

„Við erum okkar verstu óvinir, við erum með mjög góða einstaklinga innan liðsins en til þess að vinna þá þurfum við að vinna sem lið en ekki sem einstaklingar," sagði Alfreð.