Í viðtali eftir leikinn.
Tomislav Stipic, þjálfari Riga, ræddi við Fótbolta.net eftir 1-0 tap síns liðs gegn Víkingi í forkeppni Sambandsdeildarinnar í kvöld. Riga var með tveggja marka forskot fyrir þennan seinni leik liðanna og fer því áfram í 2. umferð keppninnar.
Lestu um leikinn: Víkingur R. 1 - 0 Riga FC
„Ég er bara glaður núna því þetta var mjög erfiður andstæðingur. Í fyrri leiknum þá fannst mér við betri í báðum hálfleikum. Mér fannst við líka mikið betri í fyrri hálfleik í kvöld. En síðasti hálfleikurinn af fjórum, þar var andstæðingurinn mjög öflugur og þeir sýndu sitt rétta andlit," Stipic.
„Já, ég var mjög stressaður," sagði Stipic um lokaandartök leiksins. Það var nokkuð augljóst á honum miðað við hegðun hans á hliðarlínunni.
Þegar hann var spurður hvort að sitt lið hefði verið orðið þreytt í seinni hálfleik hafði Stipic þetta að segja:
„Andstæðingurinn spilaði stórkostlegan fótbolta, voru á heimavelli á gervigrasi og hreyfðu boltann vel. Staðan var 2-0 fyrir okkur og það voru bara 45 mínútur eftir, þeir þurftu að koma og þeir komu af fullum krafti og við þraukuðum. Nei, þeir komu okkur ekki á óvart, þeir hafa spilað held ég tólf leiki á heimavelli og unnið alla nema einn. Þetta er frábært lið í Evrópu, frábær þjálfari hjá félaginu og ég sá hvernig þeir undirbjuggu sig," sagði Stipic og nefndi nokkur nöfn í liði Víkings. Viðtalið má sjá í heild sinni efst.
„Ísland er land þar sem eru sterkir karakterar, alltaf að verða betri og betri í fótbolta og ég óska þjálfaranum og liðinu alls hins besta."
Hversu mikla þýðingu hefur það fyrir Stipic og Riga að komat í næstu umferð?
„Við erum komnir í 2. umferð sem er mjög mikilvægt. Við förum núna til Ungverjalands og sjáum hvað við getum gert í næstu umferð."
Það hefur bæði verið mikil leikmannavelta og einnig þjálfaravelta á undanförnum árum hjá Riga. Var starfið hjá Stipic undir í kvöld?
„Nei, ég er með liðið í efsta sæti deildarinnar, við höfum verið á toppnum í nítján umferðir, á síðasta tímabili var liðið aldrei á toppnum. Við spilum yfirleitt góðan bolta og ég er ekki hræddur um starfið mitt. Ég nýt þess að stýra liðinu og við mættum í kvöld mjög sterkum andstæðingi," sagði Stipic.
