Jacob Neestrup, þjálfari FCK
Neestrup í leik með FH fyrir þrettán árum
Blikar mæta FCK
Neestrup ræddi Orra Stein í viðtalinu
Jacob Neestrup, þjálfari danska félagsins FCK, er ánægður að vera mættur aftur til Íslands en í þetta sinn mun hann stýra liði sínu gegn Breiðabliki í forkeppni Meistaradeildar Evrópu á Kópavogsvelli.
FCK var að hefja sitt tímabil en liðið vann 2-1 sigur á Lyngby um helgina og er nú mætt til Íslands til að taka þátt í Meistaradeildinni.
Neestrup ber mikla virðingu fyrir Blikum og að FCK þurfi að vera upp á sitt besta til að fara áfram.
„Ég sé það þannig að við erum hér eftir að hafa barist í 8-10 mánuði til að komast í stöðu þar sem við gefum sjálfum okkur tækifæri til að komast í riðlakeppni í Evrópu. Nú þurfum við að gera allt til að gera það mögulegt hér á Íslandi á morgun gegn liði sem við berum mikla virðingu fyrir. Þeir eru með augljósan styrk og sérstaklega sóknarlega og margir leikmenn sem hafa spilað marga leiki og mínútur saman en þegar allt er sagt og ef við spilum á okkar gæðabolta þá verðum við að fara áfram.“
„Við þurfum að sýna þeim virðingu og spila okkar bolta og þá eigum við möguleika á að fara áfram. Ég er ekki að segja að það verði auðvelt, því þeir eru með augljósa styrkleika og sérstaklega með boltann. Við þurfum að vinna fyrir þessu,“ sagði Neestrup við Fótbolta.net.
FCK æfði í Kaupmannahöfn áður en hópurinn flaug til Íslands en það ákvað að taka ekki æfingu á Kópavogsvelli.
„Því á síðasta tímabili breytti það taktinum. Við spilum á 3-4 daga fresti þá fáum betri takt með að æfa í Köben og taka flugið eftir það og svo slakað og náð endurheimt á kvöldin. Það eru 2-3 félög í dönsku deildinni sem spila á gervigrasi þannig við erum vanir því.“
„Það breytir engu fyrir okkur en það breytir hlutum í leiknum. Það er erfiðara að pressa, breyta um stefnu og stoppa þegar þú ert í miðju hlaupi en við erum vanir því,“ sagði hann um gervigrasið.
Neestrup bjóst alltaf við því að Blikar færu áfram. Hann hefur fylgst með íslenska boltanum um árabil og spilaði meðal annars sjálfur hér á landi en hann tók eitt tímabil með FH árið 2010. Hann var mikið efni í Danmörku en stóðst ekki þær væntingar sem gerðar voru til hans.
„Breiðablik. Ég fylgist aðeins með íslenskum fótbolta og bjó hérna fyrir nokkrum árum og veit að þetta er gott lið.“
„Ég hef komið nokkrum sinnum til Íslands eftir það. Ég bjó hérna og þetta er flott eyja og afar fallegur og sérstakur staður á þessari jörðu. Ég á enn góða vini hérna.“
„Ég var hrifinn af tímanum með góðum liðsfélögum og ef maður horfir til baka var þetta góð reynsla. Ég gerði allt sem ég gat en var ekki nógu góður og hætti að spila fótbolta og gerðist þjálfari. Ég var virkilega ánægður með tíma minn hér og vona að manneskjan sem þú talar við segi að ég hafi kannski ekki verið góður fótboltamaður en góð manneskja,“ sagði hann um tíma sinn hjá FH en í lokin var hann væntanlega að vitna í það sem Atli Viðar Björnsson og Jörundur Áki Sveinsson höfðu um hann að segja þegar þeir ræddu tíma hans hjá FH.
Myndi aldrei setja Orra í þá stöðu
Ísak Bergmann Jóhannesson og Orri Steinn Óskarsson eru báðir á mála hjá FCK, en Neestrup hefur ekkert spurt þá út í Blika.
„Nei, þeir gerðu það ekki. Ég hef ekki talað við Orra um Breiðablik eða spurt hann spurningar um lið pabba hans og ég myndi aldrei setja hann í þá stöðu. Hann vill spila og er klár í það en upplýsingarnar sem við höfum um liðið er af því við höfum fylgst með þeim. Við erum með manneskju sem hefur fylgst með þeim síðustu þrjár vikur, bæði í Dublin og á Íslandi. Við höfum séð þrjá leiki í beinni og þrjá á myndbandi, þar á meðal leikina tvo gegn Basaksehir á síðasta tímabili.“
„Auðvitað er það sérstakt fyrir bæði Orra og pabba hans. Orri veit að pabbi hans er með verk að vinna og Orri líka, þannig er það bara,“ sagði Neestrup, en hann talar einnig um Ísak Bergmann og Hákon Arnar Haraldsson í viðtalinu hér fyrir ofan.
Athugasemdir
