Baldvin Már Borgarson
„Það var ansi margt sem fór úrskeiðis í dag. Við byrjum á að gefa þeim mörk og erum bara lélegir. Alltof margir leikmenn hjá okkur sem eiga bara hræðilegan dag. Fyrirliðinn okkar Stefan Dabetic, þetta er örugglega lélegasti leikurinn hans í Ægistreyjunni og hann er búinn að vera hérna í fimm ár.“ Sagði Baldvin Már Borgarsson aðstoðarþjálfari Ægismanna sem fengu 7-2 skell gegn Grindavík á Stakkavíkurvelli í kvöld en ósigurinn þýddi jafnframt að lið Ægis er fallið úr Lengjudeildinni og leikur því í 2.deild á næsta tímabili.
Fallið eins og áður segir staðreynd en hafði það mögulega einhver áhrif inn í hópinn að allt annað en sigur þýddi fall og menn hafi jafnvel orðið stressaðri fyrir leiknum en annars?
„Það vissu allir að við vorum fallnir fyrir tveimur umferðum síðan. Við vorum að horfa í leiki gegn Selfoss, Þrótti og Þór. Leikir þar sem við hefðum átt að taka níu stig miðað við frammistöður en fengum eitt. Ef að það allt hefði gengið upp þá værum við ekki í þessari stöðu en við vissum að róðurinn væri þungur og að helvíti margt þyrfti að ganga upp til þess að við myndum ekki falla.“
Ægisliðið getur þó kvatt deildina með reisn enda þrír leikir eftir sem liðið mætir svo að segja pressulaust í. En eftir tímabilið er eitthvað sem Baldvin og liðið horfir í eftir að hafa veitt flestum liðum deildarinnar alvöru leiki? En liðið væri til að mynda ekki í fallsæti ef knattspyrnuleikir væru flautaðir af eftir 80 mínútur.
„Ég tók þess tölfræði saman um daginn og það er bara staðreynd að ef leikir í fótbolta væru 80 mínútur þá væri Ægir ekki í fallsæti en leikirnir eru 90 mínútur. Við þurfum að klára þær allar sem við höfum ekki gert í sumar.“
Sagði Baldvin en allt viðtalið má sjá í spilaranum hér að ofan þar sem Baldvin ræðir meðal annars lærdóminn af tímabilinu og þær áskoranir sem framundan eru hjá Ægi.
„“
Athugasemdir
