„Þið eruð með góða leikmenn. Markvörðurinn hefur verið frábær og við þekkjum auðvitað Gylfa frá Swansea."

Hegðun Ronaldo sorgleg
Winter hafði mjög gaman að því að sjá íslenska liðið gera 1-1 jafntefli við Portúgal í síðustu viku.

„Það var frábært og ég veit ekki hvort ég hafði meira gaman af úrslitunum eða ummælum íslensku leikmannanna gegn Ronaldo eftir leik. Við vitum að Ronaldo vill verða bestur og vinna verðlaun. Bestu leikmennirnir, eins og Pele, hafa ákveðna reisn og sýna íþróttamennsku þó að þeim hafi ekki gengið vel. Mér fannst hegðun Ronaldo gegn íslenska liðinu vera frekar sorgleg."

Winter segist ekki vera í vafa um að Ísland nái góðum úrslitum gegn Austurríki á miðvikudag og fari áfram.

„Já, pottþétt. Þið hafið liðsanda og leikmenn sem spila fyrir hvorn annan. Grikkir unnu EM 2004, þrátt fyrir að vera ekki með nema kannski einn framúrskarandi leikmann," sagði Winter.

Hreifst af menntun fólks á Íslandi
Winter kom til Íslands í fyrra og hreifst mikið af landi og þjóð. „Ég fór til Íslands í fyrra og var að ræða við heimamenn á bar. Þeir voru spenntir yfir liðinu sem er búið að búa til þrátt fyrir ekki góðar aðstæður," sagði Winter sem ætlar að heimsækja Ísland aftur í framtíðinni.

„Þetta er svo fallegur staður. Það er gaman að skoða landið, sjá norðurljósin, bláa lónið og þessa túrista hluti. Þetta er risa land með fáum íbúum. Allir virðast vera menntaðir. Leigubílstjórinn var menntaður sem verkfræðingur í háskóla, þetta hlýtur að vera menntaðasta land í heimi," sagði hinn geðþekki Winter að lokum.

Hér að ofan má sjá viðtalið í heild sinni.