„Þetta var erfiður leikur fyrir bæði lið sýndist mér. Fyrir okkar parta þá náðum við ekki að skapa nógu mikið af góðum færum og þegar líða tók á leikinn þá náðum við ekki koma boltanum fyrir og náðum ekki skoti eða slútta okkar aðgerðum," sagði Brynjar Björn Gunnarsson, þjálfari HK, eftir markalausa jafnteflið gegn Leikni R. í Pepsi Max-deildinni í kvöld.
Lestu um leikinn: Leiknir R. 0 - 0 HK
HK-ingar voru líklegri til að stela sigrinum í síðari hálfleik en það virtist þó vanta gæði upp á til að ná í stigin þrjú.
Liðið er í bullandi fallbaráttu þegar fjórir leikir eru eftir. HK-ingar eru með 14 stig í næst neðsta sæti.
„Við verðum að líta líka á björtu hliðarnar. Við héldum hreinu, vörðumst ágætlega og vorum kannski aðeins of passífir í fyrri hálfleik en aggresífari og áræðnari í síðari hálfleik."
„Vindurinn spilaði inn í og völlurinn var góður reyndar en laus í sér og menn voru að renna á hausinn stundum á erfiðum augnablikum þegar við þurftum á því að halda. Það var spenna og pressa sem spilaði líka inn í og það þarf ekki að taka það úr jöfnunni, þetta er hluti af þessu."
HK-ingar vildu fá vítaspyrnu þegar Jón Arnar Barðdal féll í teignum á 55. mínútu en ekkert var dæmt.
„Mér finnst alveg vera hægt að dæma víti á það. Hann fer fram fyrir varnarmanninn og fyrstur í boltann, varnarmaðurinn fer aftan í hann. Það er svekkjandi en ég er löngu hættur að treysta á það að dómararnir gefi okkur eitthvað," sagði Brynjar um atvikið.
Hægt er að sjá viðtalið í heild sinni hér fyrir ofan.
Athugasemdir
