Ólafur Þór Guðbjörnsson þjálfari Stjörnunnar.
„Við byrjuðum mjög vel fyrstu 5-10 mínúturnar en svo fjaraði undan þessu í fyrri hálfleik. Það var erfiður fyrri hálfleikur hjá okkur," sagði Ólafur Þór Guðbjörnsson þjálfari Stjörnunnar eftir 1-3 tap gegn Þór/KA í toppslag Pepsi-deildar kvenna í kvöld.
Lestu um leikinn: Stjarnan 1 - 3 Þór/KA
„Svo fannst mér við töluvert betri í seinni hálfleik og það var allt annað að sjá liðið þá. Ég veit ekki hvort það var stress í byrjun eða hvað það var. En við áttum lélegan fyrri hálfleik."
„Við ætluðum að loka á þessa leikmenn þeirra sem eru að skapa hættu og þær fengu nú ekki mikið af færum í þessum leik og mér fannst mörkin þeirra klaufaleg af okkar hálfu. En það nýta sér góðir leikmenn og þær hafa nokkra svoleiðis. Það var verðskuldaður sigur hjá þeim í dag. Ég verð að viðurkenna það. Við nýttum ekki færin okkar en ég hefði viljað sjá fleiri mörk í seinni hálfleik hjá okkur."
Harpa Þorsteinsdóttir spilaði sinn fyrsta leik í sumar þegar hún kom inná sem varamaður en hún ól barn í vor og hefur verið að æfa með liðinu upp á síðkastið.
„Það er gaman að sjá Hörpu koma inná. Hún er búin að vinna vel í sínum málum, bæði fyrir og eftir fæðingu. Hún er á réttri leið og eins og allir aðrir í liðinu okkar að taka þátt í þessu eins og þær geta og reyna að standa sig. Hún er að taka sín fyrstu skref núna og vonandi fjölgar þeim skrefum í framhaldinu."
Nánar er rætt við Óla í viðtalinu hér að ofan. Hann segir þar að Guðmunda Brynja Óladóttir sé að verða klár eftir meiðsli aftan í læri en hún kom inná sem varamaður í dag.
Athugasemdir
