Óli Stefán Flóventsson.
„Þetta er að fara að bresta á. Við erum spenntir. Umfangið er mikið meira en við eigum að venjast síðustu ár og við fögnum því bara og tökum því opnum örmum," segir Óli Stefán Flóventsson, þjálfari nýliða Grindavíkur.
Grindavík hefur leik á mánudaginn með leik gegn Stjörnunni. Óli hefur verið í leit að liðsstyrk rétt fyrir mót.
„Við ætlum að reyna að taka inn nokkuð sterkan leikmann og við erum að vanda okkur. Það tekur pínu tíma að fá inn alvöru leikmann en við erum ekkert stressaðir, við erum klárir. Þó hann verði ekki með í fyrsta leik þá viljum við frekar vanda okkur. Við höfum til 15. maí og notum þann tíma mjög vel."
Grindavík hefur verið að glíma við meiðsli í hópnum síðustu vikur en það er farið að horfa til betri vegar.
„Það er gaman að sjá að það er farið að fjölga á æfingum," segir Óli Stefán.
Körfuboltalið Grindavíkur hefur náð mögnuðum árangri í vetur en liðið er á leið í oddaleik gegn KR á sunnudagskvöld. Fyrir tímabilið var liðinu ekki spáð góðu gengi en það er svipað uppi á teningnum með fótboltaliðið nú.
„Körfuboltaliðið er að hita vel upp fyrir okkur. Við fáum þá sjóðheita í stúkuna. Þeir eru að sýna hvað liðsíþrótt getur verið skemmtileg þegar liðsheildin smellur. Þá eru það ekki einstaklingsgæðin sem skipta mestu máli. Þeir sýna að allt er hægt ef menn standa saman og vinna rétt úr spilunum," segir Óli Stefán sem er spenntur fyrir því að mæta Stjörnunni.
„Ánægjulegt að fá Stjörnuna, þeir hafa ofboðslega gott lið með gott teymi og góða stuðningsmenn. Það verður gaman að fá þá í rokið í Grindavík."
Viðtalið má sjá í heild í sjónvarpinu hér að ofan.
Ekki gleyma Draumaliðsdeild Eyjabita!
Mundu að gera breytingar á þínu liði í Draumaliðsdeild Eyjabita. Hægt er að skrá sig í allt sumar. Markaðurinn lokar klukkutíma fyrir fyrsta leik umferðarinnar.
Smelltu hér til að taka þátt í Draumaliðsleiknum!
Athugasemdir
