Spá þjálfara og fyrirliða fyrir Lengjudeildina: 12. sæti

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. Ægir, 27 stig

12. Ægir
Þetta hefur verið frekar skrautlegur vetur fyrir Ægismenn þar sem upphaflega planið hjá þeim var að spila í 2. deild og reyna að komast upp úr henni. En svo breyttist staðan þegar í ljós kom að Kórdrengir myndu ekki taka þátt á Íslandsmótinu. Ægismenn voru sendir upp um deild og þurftu allt í einu að undirbúa sig fyrir mun sterkari deild. Það verður fróðlegt að sjá hvernig þeim tekst upp en þeir eru langneðstir í þessari spá.



Þjálfarinn: Nenad Zivanovic tók við þjálfun Ægis fyrir 2019 þegar liðið var í 4. deild. Undir hans stjórn hefur liðið klifrað upp deildirnar og er í sumar að fara að spila í næst efstu deild. Nenad var öflugur leikmaður á sínum tíma og spilaði með Breiðabliki í efstu deild. Hann er með efnilegan aðstoðarmann með sér, Baldvin Má Borgarsson, og hafa þeir myndað sterkt teymi.


Nenad og Baldvin.

Styrkleikar: Ægismenn eru með nokkuð stóran og samheldinn hóp. Það er frekar mikil breidd og samkeppni í liðinu. Þeir eru sterkir í föstum leikatriðum og það gæti komið sér vel í Lengjudeildinni í sumar. Margir leikmenn hafa verið lengi hjá liðinu og farið með liðinu upp úr neðstu deild, líkt og þjálfararnir. Þeir eru með heilt bæjarfélag á bak við sig og það hefur sést í körfuboltanum hversu góð stemning getur myndast í Þorlákshöfn. Ef Ægismönnum tekst að fá fólk á völlinn og það verður góð stemning út frá því þá gæti það hjálpað liðinu að halda sér uppi.



Veikleikar: Þeir eru með mjög reynslulítið lið á þessu stigi leiksins, fáir leikmenn með leiki á bakinu í Lengjudeild. Liðið var að undirbúa sig fyrir 2. deild snemma á þessu ári og hefur ekki fengið mikinn tíma til að undirbúa sig fyrir styrkinn sem býr í Lengjudeildinni. Úrslitin á undirbúningstímabilinu hafa ekki verið góð og það er í raun spurning hvort menn séu einfaldlega nægilega góðir til að leika í þessari deild.

Lykilmenn: Dimitrije Cokic er frábær miðjumaður sem var gríðarlega sterkur fyrir lið Ægis í 2. deild í fyrra. Hann skoraði þá tíu mörk í 21 leik. Hrvoje Tokic er einn af fáum leikmönnum í liðinu sem er með reynslu úr þessari deild og hann hefur sannað það að hann getur skorað mikið af mörkum í Lengjudeildinni. Ef hann mætir með rétt hugarfar í deildina þá getur hann skorað helling af mörkum. Stefan Dabetic er svo hjartað í liðinu en hann er virkilega öflugur miðvörður sem ætti að geta tekið þetta stökk upp um deild frekar léttilega; miðvörður með mikil gæði.


Stefan Dabetic er mjög öflugur varnarmaður.

Fylgist með: Cristofer Moises Rolin
Vakti mikla athygli í Mjólkurbikarnum gegn FH á dögunum. Hann er með alvöru skrokk og gerir margt vel, tekur mikið til sín. Það sem hann þarf mest að laga hins vegar er að hann þarf að geta klárað færin sem hann fær. Hann tók eitt færi mjög vel á móti FH og þarf að gera meira af því. Ef hann gerir það þá gæti hann spilað á hærra stigi.


Cristofer Rolin.

Komnir
Anton Fannar Kjartansson frá Breiðabliki
Atli Rafn Guðbjartsson frá Selfossi
Baldvin Þór Berndsen frá Fjölni (á láni)
Bele Alomerovic frá Val
Benedikt Darri Gunnarsson frá Val
Daníel Smári Sigurðsson frá Fjölni (á láni)
Emil Ásgeir Emilsson frá Víkingi R.
Hrvoje Tokic frá Selfossi
Ivo Braz frá Litháen
Jóhannes Karl Bárðarson frá Víkingi (á láni)
Kristófer Jacobson Reyes frá Kórdrengjum
Marko Panic frá HK
Sladjan Mijatovic frá Serbíu
Stefán Þór Hannesson frá Fram (á láni)
Torfi Már Markússon frá Létti
Þorgeir Ingvarsson frá Magna


Tokic kom frá Selfossi.

Farnir
Arilíus Óskarsson í Stokkseyri
Arnar Páll Matthíasson í Árbæ (á láni)
Ágúst Karel Magnússon í Þrótt R.
Brynjar Ásgeir Guðmundsson í ÍH
Djordje Panic til Serbíu
Milos Djordjevic til Serbíu
Stefán Blær Jóhannsson í Árborg (á láni)
Þorkell Þráinsson í Stokkseyri

Líklegt byrjunarlið


Fyrstu þrír leikir Ægis:
5. maí, Ægir - Fjölnir (Þorlákshafnarvöllur)
11. maí, Njarðvík - Ægir (Rafholtsvöllurinn)
21. maí, Þróttur R. - Ægir (AVIS völlurinn)

Sjá einnig:
Ægismenn fá allt aðra áskorun - Upp um deild í febrúar