Spáin fyrir enska - 18. sæti: „Það toppar ekkert 6-3 mómentið"

Southampton féll úr ensku úrvalsdeildinni tímabilið 2022/23 en þeir komust beint aftur upp í fyrstu tilraun. Þeir fóru í gegnum umspilið, fóru á Wembley og báru þar sigur úr býtum í miklum pressuleik gegn Leeds United.

Southampton hafði verið upp í ensku úrvalsdeildinni frá 2012 áður en þeir féllu í fyrra. Það gekk mikið á tímabilið sem liðið féll og var hinn strangtrúaði Nathan Jones meðal annars við stjórnvölinn í nokkra leiki. Muniði eftir því? Það var áhugaverður tími svo ekki sé meira sagt. Áhugaverður kauði þar á ferð. Ruben Selles stýrði liðinu undir lok tímabilsins og svo tók við ný stefna hjá Russell Martin sem núna stýrir liðinu.

Það var gaman að horfa á Southampton á síðasta tímabili þar sem þeir voru afskaplega góðir í að halda boltanum og vildu stjórna leikjum, en á sama tíma voru þeir slappir varnarlega og það gekk illa að koma í veg fyrir að andstæðingurinn myndi skora. Enska úrvalsdeildin er gríðarlega sterk deild og það er erfitt að sjá að Southampton muni stjórna meirihluta leikja sinna. Hvernig munu þeir takast á við það? Þeir þurfa að finna ákveðnar lausnir með þann leikstíl sem þeir hafa verið að móta síðasta árið og verður fróðlegt að sjá hvernig það gengur upp.

Stjórinn: Russell Martin tók við Southampton þegar liðið féll úr ensku úrvalsdeildinni. Hann er mjög áhugaverður stjóri sem varði leikmannaferli sínum að stærstu hluta hjá Norwich. Hann var miðvörður sem einnig gat leikið sem hægri bakvörður. Hann er 38 ára gamall og má segja að hann sé af nýjum skóla sem stjóri. Hann tók sín fyrstu skref í þjálfun hjá MK Dons og stýrði svo Swansea áður en hann tók við Southampton. Hann elskar að halda í boltann en á sínu fyrsta tímabili með MK Dons hélt liðið það vel í boltann að Barcelona og Manchester City voru einu evrópsku liðin sem voru meira með hann. Martin kom Southampton upp í fyrstu tilraun og mun nú reyna að byggja á þeim árangri.

Leikmannaglugginn: Það hefur ekki farið sérlega mikið fyrir Dýrlingunum á leikmannaglugganum en þeir hafa lagt áherslu á það að kaupa inn leikmenn sem voru hjá félaginu á síðasta tímabili á láni. Tveir dýrustu leikmenn þeirra í sumar hjálpuðu liðinu að komast upp í ensku úrvalsdeildina á nýjan leik sem lánsmenn.

Komnir:
Taylor Harwood-Bellis frá Man City - 20 milljónir punda
Flynn Downes frá West Ham - 18 milljónir punda
Ben Brereton Díaz frá Villarreal - 7 milljónir punda
Yukinari Sugawara frá AZ Alkmaar - 6 milljónir punda
Nathan Wood frá Swansea - 3 milljónir punda
Ronnie Edwards frá Peterborough - 3 milljónir punda
Kuryu Matsuki frá FC Tokyo - Óuppgefið kaupverð
Charlie Taylor frá Burnley - Á frjálsri sölu
Adam Lallana frá Brighton - Á frjálsri sölu

Farnir:
Duje Caleta-Car til Lyon - 5 milljónir punda
Lyanco frá Atlético Mineiro - 4 milljónir punda
Romain Perraud frá Real Betis - 3 milljónir punda
Che Adams til Torino - Á frjálsri sölu
Stuart Armstrong - Samningur rann út



Lykilmenn:
Adam Armstrong - Hann skoraði markið sem fleytti Southampton aftur upp í ensku úrvalsdeildina. Armstrong hefur aðeins skorað fjögur mörk yfir tvö tímabil í ensku úrvalsdeildinni með Dýrlingunum en hann var frábær á síðustu leiktíð og skoraði þá 24 mörk. Það er spurning hvort hann muni eiga sitt besta tímabil í ensku úrvalsdeildinni hjá nýjum stjóra í nýju kerfi.

Taylor Harwood-Bellis - Var á láni hjá Southampton frá Man City á síðustu leiktíð og var svo keyptur eftir að liðið komst upp. Hann er öflugur hafsent með mikil gæði og mikla yfirvegun í sínum leik. Hann varð Evrópumeistari með U21 landsliði Englands og verður spenanndi að sjá hann í ensku úrvalsdeildinni í vetur.

Will Smallbone - Miðjumaður sem var ekki hluti af liði Southampton þegar liðið féll úr ensku úrvalsdeildinni síðast. Hann var þá á láni hjá Stoke City. Hann kom þó sterkur inn á síðustu leiktíð þar sem hann hljóp teiganna á milli. Hann er gríðarlega öflugur í því að koma með seinni bylgjunni inn í teiginn, þessi Frank Lampard hlaup. Ekki láta ykkur bregða ef hann skorar kannski eitt eða tvö mörk í þannig stíl í vetur.

„Ég byrjaði að halda með Southampton 1996"

Flygilhorn- og trompetleikarinn Snorri Sigurðarson er stuðningsmaður Southampton. Við báðum hann um að segja okkur meira frá liðinu og áhuga sínum á því fyrir tímabilið sem er framundan í ensku úrvalsdeildinni.

Ég byrjaði að halda með Southampton af því að... Ég byrjaði að halda með Southampton 1996. Ég var ekkert að fylgjast með boltanum, var í raun og veru bara að pæla í tónlist. En þarna sat ég á Glaumbar með bróður mínum að horfa Southampton vinna Man United 6-3. Við vorum einu mennirnir sem fögnuðu þegar Saints skoruðu enda var Manu klúbburinn með aðsetur á staðnum á þessum tíma. Síðan fór ég að fylgjast með enska og stóð mig að því að horfa alltaf neðst í töfluna og fylgjast med Saints.

Áttu uppáhalds minningu tengda félaginu þínu? Það toppar ekkert 6-3 mómentið.

Uppáhalds leikmaður allra tíma? Ég verð að segja Rickie Lambert. Skaut okkur upp um tvær deildir og hélt svo bara áfram að skora í Premier League. Geggjaður markaskorari og frábær karakter.

Hvernig fannst þér síðasta tímabil? Síðasta tímabil var auðvitað bara frábært. Ég var skíthræddur um að komast ekki upp um deild nema í efstu tveimur sætunum en svo unnum við playoffs á móti virkilega sterku liði. Þetta var hrikalega skemmtileg deild á síðasta ári og samkeppnin rosaleg milli efstu fjögurra liðanna. Saints voru í fjórða með 87 stig!

Ertu með einhverja sérstaka leikdagshefð? Engin hefð hjá mér á leikdegi. Ég er tónlistarmaður og vinn oft um helgar svo ég er oft á ferðinni þegar leikir eru. Svo þekki ég eiginlega engan sem heldur með Saints fyrir utan son minn svo þetta er ekki mikið hópsport.

Hvern má ekki vanta í liðið? Á síðasta tímabili var Flynn Downes sá hlekkur sem mátti alls ekki vanta hjá okkur. Það kæmi mér ekki á óvart að hann væri fyrstur á blað næsta vetur.

Hver er veikasti hlekkurinn? Ég myndi segja að markmannsstaðan sá veikasti hlekkurinn. Gavin Bazunu er fyrsti kostur en er mjög ungur. Hann er meiddur núna þannig að Alex McCarthy sem Bazunu tók við af virðist vera næsti kostur. Það er töluvert áhyggjuefni þar sem að McCarthy þótti ekki nógu góður þegar við vorum uppi.

Þessum leikmanni á að fylgjast með... Ég er spenntastur að fylgjast med Carlos Alcaraz. Geggjaður 21 árs miðjumaður sem kom til okkar tímabilið sem við féllum úr Premier League. Hann spilaði ekki með á síðasta tímabili en fór í staðinn á lán hjá Juventus. Eina áhyggjuefnið er að hann er ansi blóðheitur, tókst meira að segja að fá rautt spjald á móti Lazio í vináttuleik í gær.

Við þurfum að kaupa... Ég held við þurfum betri og reyndari markmann. Það er búið að ganga vel að fylla í aðrar stöður svo markmannsstaðan er sú sem ég hef mestar áhyggjur af.

Hvað finnst þér um stjórann? Ég er ánægður með stjórann. Hann er með skýrt leikplan og fær leikmenn með sér í lið. Hann vill halda boltanum og spila sem kom oft í bakið á okkur í Championship þegar ekki tókst að vera dóminerandi og skora fljótt. Hann er hins vegar ungur og er enn að læra og er óhræddur að nota unga leikmenn, og það fellur Southampton stuðningsfólki vel.

Hvernig líður þér fyrir tímabilinu sem er framundan? Tímabilið framundan verður klárlega spennandi. Liðin sem fóru niður voru léleg en liðin sem komu upp eru virkilega sterk. Ég held að fallbaráttan gæti orðið rosalega á næsta tímabili.

Hvar endar liðið? Ég hef ekki hugmynd um hvar við endum. Bilið á milli stærstu/ríkustu liðana og afgangsins er alltaf að stækka. En á sama tíma finnst mér bilið á milli allra hinna alltaf vera að minnka. Liðin eru mörg hver farin að spila fínasta bolta og munurinn oft bara hvort liðið sé með hæfan þjálfara og nái að næla sér í óslípaða demanta sem stærri liðin þora ekki að taka sénsinn á.

---

Þau sem spáðu: Arnar Laufdal Arnarsson, Brynjar Ingi Erluson, Elíza Gígja Ómarsdóttir, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Ívan Guðjón Baldursson, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke og Sölvi Haraldsson.

Liðin fengu eitt stig og upp í 20 eftir það hvar hver og einn spáði þeim. Liðið í síðasta sæti fékk eitt stig, liðið í 19. sæti tvö stig og koll af kolli. Stigin í spánni tengjast á engan hátt stigafjölda liðanna í deildinni..

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. ?
13. ?
14. ?
15. ?
16. ?
17. ?
18. Southampton, 42 stig
19. Nottingham Forest, 37 stig
20. Ipswich Town, 27 stig