Spá Fótbolta.net - 2. sæti: FH

Spáin:
1. Valur
2. FH 73 stig
3. Stjarnan 67 stig
4. KA 60 stig
5. KR 58 stig
6. Breiðablik 55 stig
7. Grindavík 43 stig
8. Fjölnir 23 stig
9. ÍBV 21 stig
10. Fylkir 19 stig
11. Víkingur R. 18 stig
12. Keflavík 15 stig

Um liðið: Síðasta tímabil var vonbrigði fyrir stórveldið FH. Liðið komst í bikarúrslit en sýndi þar dapra frammistöðu og tapaði fyrir ÍBV. Í fyrsta skipti í langan tíma, eða frá 2002, endaði liðið ekki í öðru af tveimur efstu sætunum en náði þó að komast í Evrópukeppni. Það er ljóst í Krikanum eru menn staðráðnir að rísa upp aftur og miklu verið til kostað til að það gerist.

Þjálfari - Ólafur Kristjánsson FH er að hefja nýjan kafla undir stjórn nýs þjálfara og það hafa orðið talsvert miklar breytingar á leikmannahópnum. Ólafur er kominn aftur í íslenska boltann, reynslunni ríkari eftir dvöl sína í Danmörku, og fróðlegt verður að fylgjast með prófessornum og hans verkum í sumar. Ólafur, sem gerði Breiðablik að Íslandsmeisturum 2010, tók við af Heimi Guðjónssyni sem var látinn fara eftir síðasta tímabil.

Glorhungraðir eftir vonbrigðin í fyrra

Styrkleikar: FH-liðið er pakkfullt af gæðum og reynslu. Hefðin fyrir toppbaráttu og titlum er rík í Hafnarfirði. Mikil samkeppni er um fremstu stöðurnar sem og stöðurnar á miðjunni þar sem valinn maður er í hverju rúmi. FH hefur fengið til sín hrikalega öfluga leikmenn, bæði íslenska og erlenda. Penninn hefur verið á lofti í Krikanum og veskið opið. Gera má ráð fyrir því að menn séu glorhungraðir í árangur eftir vonbrigðin í fyrra og FH-liðið gæti reynst hættulegt rándýr í sumar.

Veikleikar: Þegar breytingarnar eru eins margar og raun ber vitni getur tekið tíma fyrir lið að finna taktinn. Þegar stutt er í mót er enn að komast mynd á öftustu línu hjá liðinu en Hjörtur Logi og Gummi Kristjáns hafa báðir verið að sinna afleysingum í hjarta varnarinnar. Mun allt smella þegar flautað verður til leiks í Grindavík á laugardaginn?

Lykilmenn: Davíð Þór Viðarsson og Steven Lennon. Fyrirliðinn Davíð er FH-ingum hrikalega mikilvægur eins og allir fótboltaáhugamenn vita vel. Lennon er sá leikmaður sem er hvað oftast nefndur þegar rætt er um besta leikmann deildarinnar. Breiðablik hefur reynt að krækja í Skotann en FH-ingar eru ákveðnir í að halda honum enda hrikalega snjall leikmaður.

Gaman að fylgjast með: Jónatan Ingi Jónsson er 19 ára vængmaður sem FH-ingar voru að endurheimta. Hann hefur verið í unglingaliðum AZ Alkmaar síðan 2015 og spennandi að sjá hvort þessi öflugi unglingalandsliðsmaður stimpli sig vel inn. Einnig verður gaman að fylgjast með Geoffrey Castillion og hvort hann muni ná að vera drjúgur fyrir FH í markaskorun. Hann var baneitraður með Víkingi R. í fyrra en hefur verið frekar kaldur í vetur.

Spurningamerkið: Varnarleikurinn. Þrátt fyrir öflugan hóp eru FH-ingar ekki ríkir af miðvörðum. Pétur Viðarsson hefur leikið í hjarta varnarinnar en Rennico Clarke gat ekki verið með í síðasta æfingaleik fyrir mót þar sem hann var í Jamaíka að ganga frá pappírum vegna sakavottorðs. FH hefur verið að spila mönnum út úr stöðum í afleysingar í vörninni.

Völlurinn: Kaplakrikavöllur er glæsilegt mannvirki og allt til alls. FH-ingar eru sífellt að bæta við aðstöðu sína og pallurinn sem hefur verið settur upp fyrir utan hefur gefið skemmtilegan blæ. Þar geta stuðningsmenn hitað vel upp fyrir leiki.

„Tekur tíma að fá öll púslin til að falla á réttan stað"

Þjálfarinn segir - Ólafur Kristjánsson
„Ég tel að þetta sé alveg eðlileg spá. FH hefur verið mjög ofarlega undanfarin ár og mikið lagt í umgjörð og aðbúnað. Við erum með öflugan hóp. Eins og þið fjölmiðlamenn vitið þá hafa orðið breytingar og við sem stöndum að liðinu vitum að það tekur tíma að fá öll púslin til að falla á réttan stað. Það er eðlilegt að gera þessa kröfu og við sjálfir viljum meira. Mér sýnist öll lið deildarinnar vera á nokkuð góðum stað og veturinn verið fjörugur. Í íslenskum fótbolta gefa allir sig í leikina og öll úrslit eru möguleg."

Komnir:
Eddi Gimes frá Henan Jianye á láni
Geoffrey Castillion frá Víkingi R.
Guðmundur Kristjánsson frá Start
Hjörtur Logi Valgarðsson frá Örebro
Kristinn Steindórsson frá GIF Sundsvall
Rennico Clarke frá Portland Timbers
Viðar Ari Jónsson frá Brann á láni
Zeiko Lewis frá New York Red Bulls
Egill Darri Makan frá Breiðabliki
Bandur Olsen frá Randers
Jónatan Ingi Jónsson frá AZ Alkmaar

Farnir:
Böðvar Böðvarsson til Jagiellonia Białystok (Pólland)
Bergsveinn Ólafsson í Fjölni
Emil Pálsson til Sandefjord
Guðmundur Karl Guðmundsson í Fjölni
Jón Ragnar Jónsson hættur
Kassim Doumbia til Maribor
Matija Dvornekovic

Sjá einnig:
Hin hliðin - Viðar Ari Jónsson
Gummi Kristjáns og Davíð Þór mættu í viðtal

Leikmenn FH sumarið 2018:
1 Gunnar Nielsen
2 Teitur Magnússon
3 Cédric D'Ulivo
4 Pétur Viðarsson
5 Hjörtur Logi Valgarðsson
6 Robbie Crawford
7 Steven Lennon
8 Kristinn Steindórsson
9 Viðar Ari Jónsson
10 Davíð Þór Viðarsson
11 Atli Guðnason
12 Vignir Jóhannesson
13 Bjarni Þór Viðarsson
14 Grétar Snær Gunnarsson
15 Rennico Clarke
16 Guðmundur Kristjánsson
17 Atli Viðar Björnsson
18 Eddi Gomes
19 Zeiko Lewis
20 Geoffrey Castillion
21 Egill Darri Makan
22 Halldór Orri Björnsson
23 Þórarinn Ingi Valdimarsson
24 Daði Arnarsson
25 Einar Örn Harðarsson
26 Baldur Logi Guðlaugsson
27 Brandur Olsen
30 Jónatan Ingi Jónsson

Leikir FH 2018:
28.apríl Grindavík – FH
7.maí FH – Breiðablik
13.maí Fjölnir – FH
17.maí FH – KA
21.maí ÍBV – FH
28.maí FH – Fylkir
4.júní FH – Keflavík
10.júní KR – FH
14.júní FH – Víkingur R.
20.júní Valur – FH
2.júlí FH – Stjarnan
7.júlí FH – Grindavík
22.júlí Breiðablik – FH
29.júlí FH – Fjölnir
8.ágúst KA – FH
12.ágúst FH – ÍBV
19.ágúst Fylkir – FH
26.ágúst Keflavík – FH
2.september FH – KR
16.september Víkingur R. – FH
23.september FH – Valur
29.september Stjarnan – FH

Spámennirnir: Arnar Daði Arnarsson, Elvar Geir Magnússon, Guðmundur Aðalsteinn Ásgeirsson, Hafliði Breiðfjörð, Magnús Már Einarsson, Magnús Þór Jónsson og Tryggvi Guðmundsson.