Spáin fyrir enska - 12. sæti: „Roy kann að nota hann rétt"

Um Crystal Palace: Félagið hefur núna haldið sér upp í ensku úrvalsdeildinni í tíu ár en liðið var síðast í Championship-deildinni árið 2013.

Síðasta tímabil var áhugavert hjá Palace-mönnum því Patrick Vieira, sem virtist á ákveðnum augnablikum vera að taka liðið inn í nýja tíma, var rekinn og Roy Hodgson var ráðinn í hans stað. Hodgson, sem stýrði Palace á undan Vieira, gerði stórkostlega með liðið og hann verður áfram við stýrið.

Það er nýr kafli í sögu Palace að hefjast því Wilfried Zaha er farinn til Tyrklands. Hann var alveg magnaður fyrir félagið en það var líklega kominn tími á að hann myndi skipta um umhverfi og prófa eitthvað annað. Palace hefur aldrei endað ofar en í tíunda sæti á síðustu tíu árum en það er spurning hvort það breytist núna á komandi leiktíð.

Stjórinn: Hodgson er einn sá reyndasti í þessum bransa. Það kom mörgum á óvart að hann væri tilbúinn að snúa aftur enda er hann orðinn 75 ára gamall. En hann getur bara ekki hætt, hann getur það ekki. Hodgson hefur komið víða við á ferli sínum, ferli sem byrjaði hjá Crystal Palace árið 1963. Hodgson hefur þjálfað í Svíþjóð, Sviss, Ítalíu, Danmörku og Noregi. Þá hefur hann þjálfað nokkur landslið á sínum ferli, þar á meðal enska landsliðið - eftirminnilega. Hodgson kom gríðarlega sterkur inn á síðasta tímabili og það verður fróðlegt að sjá hvort hann nái að halda þeim dampi.

Leikmannaglugginn: Crystal Palace hefur aðeins bætt við sig einum leikmanni í sumar og það hafa verið fáar breytingar á hópnum, fyrir utan auðvitað stóru breytinguna að Zaha sé farinn.

Komnir:
Jefferson Lerma frá Bournemouth - á frjálsri sölu

Farnir:
Wilfried Zaha til Galatasaray - samningur rann út
Jack Butland til Rangers - samningur rann út
James McArthur - samningur rann út
Luka Milivojevic - samningur rann út

Út frá leikmannaglugganum þá er líklegt byrjunarlið svona:



Lykilmenn: Núna þegar Zaha er farinn þá eru tveir leikmenn að fara taka mikið við keflinu en það eru Ebere Eze og Michael Olise. Sá síðarnefndi er líklega einn mest spennandi leikmaður deildarinnar en hann hefur verið orðaður við stærri félög í allt sumar, gríðarlega skapandi og skemmtilegur fótboltamaður þar á ferðinni. Miðvörðurinn Marc Guehi er afar mikilvægur fyrir þetta lið en hann hefur nánast spilað hverja einustu mínútu eftir að hann kom frá Chelsea. Það verður einnig spennandi að fylgjast með miðjumanninum Cheick Doucoure í ljósi þess að það er búið að orða hann mikið við Liverpool í sumar.

„Hef aldrei séð eftir því"
Sverrir Hilmar Gunnarsson, fyrrum leikmaður Mjondalen í Noregi, er stuðningsmaður Crystal Palace og við fengum hann til að svara nokkrum spurningum fyrir tímabilið sem framundan er.

Ég byrjaði að halda með Crystal Palace af því að... Harðasti stuðningsmaður Palace á Íslandi, Smári Geirsson, sannfærði mig þegar ég var átta ára að Crystal Palace væri klúbburinn að halda með. Hef aldrei séð eftir því, og náði að sannfæra son minn um það sama.

Áttu uppáhalds minningu tengda félaginu þínu? Þegar ég fór með son minn til Englands á leik í fyrsta skipti. Heima á móti Tottenham 2015, lentum undir 1-0 en snérum við taflinu og unnum leikinn 2-1.

Hvernig fannst þér síðasta tímabil? Erfitt framan af. Hafði mikla trú á Vieira, en þegar hann var með Eze á bekknum fleiri leiki í röð þá var fínt að láta hann fjúka. Roy sá um að tímabilið endaði vel.

Ertu með einhverja sérstaka leikdagshefð? Nei, ekkert svoleiðis. En ég má helst ekki missa af leik. Var í brúðkaupi fyrir nokkrum árum síðan, þá földum við feðgar okkur inn í herbergi til að horfa á leik.

Hvern má ekki vanta í liðið? Marc Guehi, gríðarlega mikilvægur fyrir liðið.

Hver er veikasti hlekkurinn? Sóknarlínan. Of lítið af mörkum frá Edouard og Mateta.

Þessum leikmanni á að fylgjast með... Eze klárlega. Búinn að vera sjóðheitur á undirbúningstímabilinu, og Roy kann að nota hann rétt.

Við þurfum að kaupa... Eiginlega mikilvægast að ná að halda Eze, Guehi og Olise. Myndi samt vilja sjá Nketiah frá Arsenal í sókninni.

Hvað finnst þér um stjórann? Roy er frábær, og án efa einn efnilegasti stjórinn á Englandi um þessar mundir.

Hvernig líður þér fyrir tímabilinu sem er framundan? Bjartsýnn eins og alltaf. En ég veit af reynslu að það að vera Crystal Palace aðdáandi getur verið krefjandi.

Hvar endar liðið? Við náum endilega topp tíu, og segi bara að við endum í áttunda sæti.

Fulham hefur leik í ensku úrvalsdeildinni laugardaginn 12. ágúst gegn Sheffield United á útivelli.

---

Þau sem spáðu: Alexandra Bía Sumarliðadóttir, Aksentije Milisic, Anton Freyr Jónsson, Arnar Laufdal Arnarsson, Brynjar Ingi Erluson, Elíza Gígja Ómarsdóttir, Elvar Geir Magnússon, Guðmundur Aðalsteinn Ásgeirsson, Jóhann Þór Hólmgrímsson, Ívan Guðjón Baldursson, Stefán Marteinn Ólafsson og Sverrir Örn Einarsson.

Liðin fengu eitt stig og upp í 20 eftir það hvar hver og einn spáði þeim. Liðið í síðasta sæti fékk eitt stig, liðið í 19. sæti tvö stig og koll af kolli. Stigin í spánni tengjast á engan hátt stigafjölda liðanna í deildinni..

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. Crystal Palace, 96 stig
13. Fulham, 81 stig
14. Burnley, 80 stig
15. Wolves, 71 stig
16. Nottingham Forest, 67 stig
17. Everton, 66 stig
18. Bournemouth, 56 stig
19. Sheffield United, 31 stig
20. Luton Town, 16 stig